Costa da Morte
A morte levantou un templo nun estraño e solitario lugar. Edgar A. Poe
Terra máxica situada nos confíns da vella Europa, chea de lendas, tradicións e naufraxios, cada día alcanza maior personalidade e atracción turística.
As persoas que nos visitan séntense enmeigados pola fermosura das paisaxes costeiras, pola riqueza do patrimonio histórico, pola cantidade e a importancia dos seus faros, pola maxia das pedras ou pola súa excelente gastronomía.
Visitar A Costa da Morte significa chegar ao final dun camiño de peregrinación cara á terra máis occidental do vello continente, seguido por miles persoas ao longo da historia, para encontrarse co renacer da vida, con vellos cultos pagáns, que aquí se mostran con todo o seu esplendor: auga, sol, pedras, mar…
Dende os abruptos acantilados ata os sempre verdes e fértiles vales do interior, pasando por aldeas ou acolledores e abrigados portos de mar. O lugar é quizais o de menos porque a cada paso descubrirá que A Costa da Morte está chea de vida.
